ترا چِہ کار گوں شپءَ؟
ترا شپءِ ودار چے؟
منی ہمک دمءَ شپے بلیت
نوں بے ترا
اے ہستی ے کہ نیستیاں وَدی کتہ
تو زانئے؟ انوں ہورے گوارگا اِنت اندرءَ
دریگءِ دیما
آ کشءَ
اے اکس منیگ اِنت باتنءِ
اے ترمپءُ ارس ءِ سیادی اِنت
دلءَ رچیت اگاں درءَ
زمینءَ نمب کنت یا سینگءَ منی
بلے تو وہدءِ گردِشاں بدل بکن
شپانی جاہءَ روچ کن
شپءِ بلگ وَ دیریگیں نوں آدتے
تو روچاں آہگءِ بہ ساچءُ بیا
بہ گوْار
دلءِ ڈگارءُ ڈنّاں تر بکن
منی ودارءَ تر بکن
